Xildhibaanka Kamakunji ayaa Markii Ugu Horaysay soo Bandhigay Wax Qabadkiisa
Nairobi (MMedia) - Xildhibaanka cusub ee deegaanka Kamakunji ayaa ballan qaaday inuu ku dadaali doono sare u qaadida adeegyada aasaasiga ee ah deegaanka Kamakunji gaar ahaanna xaafadda Eastleigh.
Isagoo waraysi gaar ah siiyay shabakadda Hiiraan Online ayuu yuusuf sheegay inuu wax ka qaban doono waddooyinka burbursan ee Islii, soo celinta bilicda xaafadda iyo waliba sare u qaadidda ammaanka.
“Wakhti badan ma haysanno oo bilo yar kadib , waxaa dalka ka dhacaya doorashooyinka guud ee baarlamaanka iyo madaxtinimada, laakiin waxaan ku dadaali doonaa inta aan haysanno inaan uga faa’iideeyo dadkayga”. Ayuu yiri xildhibaanku.
Yuusuf oo ku guulaystay doorashadii Kamakunji ka dhacday 2 maalmood ka hor ayaa ammaan u soo jeediyay mudanihii la tartamayay ee Ibraahim Axmed (Johnnie) , isagoo ka dalbaday inuu kala shaqeeyo sidii wax loogu qaban lahaa dadka Kamakunji iyo sidii loo baabi’in lahaa kala qaybsanaanta ay keentay intii ay doorashadu socotay.
“Walaalkey Ibraahim waan ogahay wuxuu isu taagay inuu dadkiisa wax u qabto haddana hawshu way inuu wada taallaa, gaar ahaanna sidii loo adkayn lahaa midnimada bulshada Soomaalida ee dalka Kenya”. Ayuu sii raacshay Yuusuf.
Xildhibaanka cusub ee deegaanka Kamakunji ayaa sidoo kale ka dhawaajiyay inuu la dagaallami doono musuqmaasuqa hareeyay guud ahaan dalka Kenya , gaar ahaanna deegaanka isaga laga soo doortay.
Yuusuf waxaa uu mahad ballaaran u jeediyay ummada Soomaaliyeed oo uu ku tilmaamay inay garab istaageen xilligii doorashada iyo markii la doortayba.
“Mahad ayaan u celinayaa ummada Soomaaliyeed, markii la i doortay meel walba ayay iga soo waceen, gaar ahaanna qurbo joogta oo meel walba iga soo hambalyeeyay, taasina waxay ii tahay farxad”. Ayuu yiri Yuusuf.
Yuusuf Xassan oo ah xildhibaankii ugu horreeyay ee Soomaali ah oo kasoo gala deegaanka Kamakunji iyo guud ahaanba Nairobi ayaa looga fadhiyaa inuu ka dhabeeyo ballaanqaadyadii uu sameeyay xilligii doorashada, iyadoo ay hortaallo hawlo waawayn oo ay kamid tahay la xisaabtamidda dawladda hoose ee Nairobi oo lagu eedeeyo inay indhaha ka daboolatay dayaca ka jira xaafadda Eastleigh.
Maakhir Media Kenya
